නැවේ ගින්න පටන් ගත්තේ අරාබි මුහුදින් – කටාරය ඇතුල් වෙන්න දීලා නෑ – නෞකාව හිමි සමාගම් ප්‍රධානියා ගෙන් විශේෂ හෙළිදරව්වක්

කොළඹ වරායට ආසන්නයේදී ගිනි ගැනීමට ලක්වෙමින් ඇති එක්ස්ප්‍රස් පර්ල් නෞකාව කොළඹ වරායට පැමිණීමට පෙර වෙනත් වරායන් දෙකකට ඇතුල්වීමට අවසර ඉල්ලා තිබුනත් එම වරායන් දෙකෙන්ම මෙම නෞකාවට ඇතුළු වීම සඳහා අවසර හිමිවී නැති බව එම නෞකා සමාගමේ විධායක අධ්‍යක්ෂක ටීම් හාර්ට්නොල් ප්‍රකාශ කර සිටිනවා.

එක්ස්ප්‍රස් පර්ල් නෞකා සමාගමේ විධායක අධ්‍යක්ෂකවරයා ගේ ප්‍රකාශයක් උපුටා දක්වමින් විදෙස් මාධ්‍ය වාර්තා කර තිබුනේ මෙම නෞකාවේ ගින්නට හේතුව ඒ තුල ප්‍රවාහනය කරමින් තිබූ රසායන ද්‍රව්‍ය කාන්දුවක් බවයි.

ගිනි ගනිමින් තිබෙන එක්ස්ප්‍රස් පර්ල් නෞකාවේ රැගෙන යමින් තිබූ කන්ටේනර් 1486 ක් අතරේ නයිට්‍රික් ඇසිඩ් ටොන් 25ක් අඩංගු කන්ටේනර් කීපයක් ද ඇතුළත්ව තිබුණා. මෙම රසායන ද්‍රව්‍ය අඩංගු කන්ටේනර නිසි පරිදි ගබඩා කර නොතිබීම හේතුවෙන් මෙම ගින්න ඇතිවූ බවයි එම සමාගමේ විධායක අධ්‍යක්ෂකවරයා සඳහන් කර ඇත්තේ.

” නෞකාවේ ඇසුරුම් කර තිබු කන්ටේනර් බහාලුම් වල තිබෙන රසායනික ද්‍රව්‍ය කාන්දුවෙමින් තිබෙන බවට එහි සිටි සේවකයින් පළමුව දැක තිබුනේ ශ්‍රී ලංකාවට කිලෝමීටර් දහසකට ඈතින් පිහිටි අරාබි මුහුදේදී. ඒ ගැන දැනගත් විගස නෞකාවේ කපිතාන්වරයා ඉන්දියාවේ හසීරා වරායෙන් සහ කටාර් හි හමාඩ් වරායට ඇතුල් වීමට අවසර ඉල්ලා තිබුණා. ඒ එම නෞකාවේ තිබු බහාලුම් බෑමටයි. නමුත් අවසර හිමිවුයේ නැහැ. ඒ අනුවයි නෞකාව ආසන්නතම වරාය වන ශ්‍රී ලංකාවට පැමිණියේ” නෞකා සමාගමේ විධායක අධ්‍යක්ෂකවරයා උපුටා දක්වමින් විදෙස් මාධ්‍ය වාර්තා කර සිටියා.

කෙසේ වෙතත් ඒ වන විටත් නෞකාව තුළ ගින්නක් ඇති වීමේ අවදානමක් මතුව තිබූ බව සමාගමේ විධායක අධ්‍යක්ෂවරයා පිළිගෙන ඇත්තේ.

” ඉන්දියාවේ සහ කටාර් රාජ්‍යයේ වරායන් දෙකෙන් අපට අවස්ථාව ලබාදුන්නා නම් මෙම බහාලුම් ගොඩබෑමට මෙවැනි ඛේදවාචකයක් ඇතිවීමට ඉඩ නොතිබෙන්න තිබුණා” ඔහු වැඩිදුරටත් කියා සිටියා.

කොළඹ වරායට සැතපුම් 9.5ක් දුරින් ගිනි ගනිමින් තිබෙන MV එක්ස්ප්‍රස් පර්ල් නෞකාව මේ වන විට දකුණු දෙසට ඇලවී ඇති බවත් ඉදිරි පැය කිහිපයේදී නෞකාව මුහුදුබත් වීමට ඇති ඉඩකඩ වැඩි බවයි සාගර විශේෂඥයින් සඳහන් කරන්නේ.

Next Post

ඇමරිකා ජනපතිගෙන් ගෞරව උපාධියක් ගත් අපේ නාවිකයා - විශ්ව ෆොන්සේකාගෙන් ලංකාවට තවත් අභිමානයක්

Thu May 27 , 2021
ඇමෙරිකාවේ වෙරළාරක්ෂක ඇකඩමියෙන් සමුද්‍රීය වාස්තුවිද්‍යා සහ සමුද්‍රීය ඉංජිනේරු ගෞරව උපාධියක් ලබා ගැනීමට ශ්‍රී ලංකා නාවික හමුදාවේ උප ලුතිනන්වරයෙකු (පළමු පන්තියේ ) වන විශ්ව ෆොන්සේකා මහතා සමත්ව ඇතැයි ඇමෙරිකාවේ වොෂිනටන් නුවර ශ්‍රී ලංකා තානාපති කාර්යාලය කියා සිටී. මෙහි වැදගත් සිදුවීම වූයේ ඔහුට හිමි උපාධිය සහතිකය ඇමෙරිකා එක්සත් ජනපද ජනාධිපති ජෝ බයිඩ්න් […]

Breaking News