ඉන්නෙ සී වාට්ටුවේ – නිදාගන්නේ පැදුරේ – කන්නෙ කල්දේරම් බත – රන්ජන්ගේ අගුණකොළේ ජීවිතේ

අධිකරණයට අපහාස කිරීමේ චෝදනාවට ලක්ව සිව් වසරක් බරපතළ වැඩ ඇතිව හිරේට නියම වූ ජනප්‍රිය චිත්‍රපට නළු, පාර්ලිමේන්තු මන්ත්‍රී රන්ජන් රාමනායක පල්ලන්සේන තරුණ සිරකරුවන්ගේ (විශෝධන) මධ්‍යස්ථානයේ නිරෝධායනය වීමෙන් අනතුරුව ඔහුගේ නවාතැන්පොළ බවට පත්වීමට නියමිතව තිබුණේ වැලිකඩ සිර කදවුරටයි. ඔහු වෙනුවෙන් වැලිකඩ සිර කදවුරේ ‘වයි.ඕ.’ යනුවෙන් නම් කර ඇති සිර මැදිරිය පවා සූදානම් කර තිබුණි. එහෙත් ඉකුත් 26 වෙනිදා ඔහුව පල්ලන්සේනේ සිට රැගෙන යන්නේ අඟුණුකොළපැලැස්ස සිර කදවුරටය. ඒ කල් තියා ඔහුව රඳවන වැලිකඩ සිර කදවුරේ ස්ථානයන් ගැන කළ හෙළිදරව්වෙන් බලධාරීන් යම් කලබලයකට පත්වීමෙනි.

අධිකරණයෙන් සිර දඬුවමක් නියම වන සිරකරුවන් මුලින්ම රඳවා තැබෙන්නේ වැලිකඩය. මෙයට පෙර අධිකරණයට අපහාස කිරීමේ චෝදනාවන්ට ලක්වූ ටෝනි එමානුවෙල්, එස්. බී. දිසානායක මෙන්ම, ඥාන’සාර හිමියන්ද රඳවා තැබුවේ වැලිකඩය. එසේම මරණ – දණ්ඩනය සහ ජීවිතාන්තය දක්වා සිර’දඬුවම් නියම වන සිරකරුවන්ද මුලින්ම රඳවා තැබෙන්නේ වැලිකඩ සිර කදවුරේ. දෙවැනුවට වැලිකඩ සිට සිරකරුවන්ට මාරුවීමක් ලැබෙන්නේ නම් ඒ බෝගම්බර සිර කදවුරටයි. දැන් බෝගම්බර සිර කදවුර වෙනුවට ඇත්තේ දුම්බර සිර කදවුරයි. ඒ අනුව සිරකරුවන් යොමු කෙරෙන්නේ දුම්බර සිර කදවුරටයි. ඊළඟ ස්ථාන මාරුවීම සිරකරුවෙකුට ලැබෙන්නේ මහර සිර කදවුරටය. සිරකරුවන් සිර කදවුරකින් සිර කදවුරට මාරු කිරීමේදී අනුගමනය කළ යුතු මෙවන් ක්‍රියා පිළිවෙතත් පවතින්නේ අනාදිමත් කාලයක සිටය.

ශ්‍රේෂ්ඨාධිකරණය විසින් රන්ජන් රාමනායකට ඉකුත් 12 වෙනිදා සිව් වසරකට බරපතළ වැඩ ඇතිව සිර’දඬුවම් නියම කිරීමෙන් අනතුරුව බන්ධනා’ගාර බස් රථයකින් ඔහුව රැගෙන යන්නේද වැලිකඩටය. ඔහු හැඳ සිටි යුරෝපීය ඇඳුම වෙනුවට සිර කදවුරේ සිරකරු’වන්ගේ නිල ඇඳුම වන ජම්පරය ඔහුට අන්දවන්නේද වැලිකඩදීය. අනතුරුව ඔහුව එතැනින් රැගෙන යන්නේ නිරෝධායනය සඳහා පල්ලන්සේනටය. එහි සිට ඔහුව 26 වෙනිදා වෑන් රථයකින් රැගෙන යන්නේ අඟුණුකොළපැලැස්සටය.

අඟුණුකොළපැලැස්ස සිර කදවුර අපේ රටේ සිර කදවුරු පද්ධතියට අලු‍තින්ම එක්වූවෙකි. යුරෝපීය සිර කදවුරක ආකෘතියට ඉදිකර ඇති එය සැළකෙන්නේ මෙරට ඇති සුපිරිම සිර කදවුර ලෙසිනි. තංගල්ල සිර කදවුර ඉවත්කර ඉඩ පහසුකම් ඇති සිර කදවුරක් නිර්මාණය කිරීම වෙනුවෙන් මහින්ද රාජපක්ෂ ආණ්ඩුව සමයේදී ඉදිකිරීම් ආරම්භ කෙරුණු අඟුණුකොළපැලැස්ස සිර කදවුර විවෘත වන්නේ 2017 වසරේ යහපාලන ආණ්ඩුව සමයේදීය. පිහිනුම් තටාක, කායවර්ධන මධ්‍යස්ථාන සහ අංග සම්පූර්ණ ක්‍රීඩා පිටියකින්ද පොහොසත් අඟුණකොළපැලැස්ස සිර කදවුර සනීපාරක්ෂාවද සෙසු සිර කදවුර හා සාපේක්ෂව සැසඳීමේදී සුපිරිය. ඒවා තවමත් ජරාවාස වී නැත. අදටත් ඇත්තේ ගඳ නොගසන තත්වයේය. සිරමැදිරි පවා සෙසු සිර කදවුරු තරම් අප්‍රසන්න වී නැත.

රන්ජන් රාමනායකට අගුණුකොලපැලැස්ස සිර කදවුර මේ වන විට වෙන්ව ඇත්තේ ‘සී’ වාට්ටුවය. ‘කො’විඩ් 19’ වෛරස ව්‍යාප්තිය හේතුවෙන් ‘සී’ වාට්ටුව වෙන්ව ඇත්තේ අගුණුකොලපැලැස්ස සිර කදවුරට අලු‍තින් ඇතුලු‍ කරන සිර කරුවන් දින 14ක් නිරෝධායනය සඳහා රඳවා තබන්නටය. ඒ අනුව පල්ලන්සේනේ දින 14ක් නිරෝධායනය වූ රන්ජන්ට අගුණුකොලපැලැස්සේද තවත් දින 14ක් නිරෝධායනය වීමට සිදුවනු ඇත. එම වාට්ටුවේ ඔහු සිටින්නේ තනිවම නොවේ. විවිධ වැරැදි සම්බන්ධයෙන් අධිකරණයෙන් සිර දඬුවම් නියම වූ කිහිපදෙනෙක්ම රඳවා සිටිති. නිරෝධායන කාල සීමාව අවසන් වන තුරු එම වාට්ටුවෙන් පිටතට ගොස් සෙසු සිර කරුවන් හා මිශ්‍ර වීමට ඔවුන්ට අවසරය හිමි නොවීමද විශේෂත්වයකි. ආහාර පාන ලබා ගැනීමටද විශේෂ ක්‍රමවේදයක් ඒ අය වෙනුවෙන් සකස් කර ඇත්තේ ආරක්ෂාව මුල්කරගෙනය. එම වාට්ටුවේ රඳවා තැබෙන සිර කරුවන් වෙනුවෙන් වෙනම වැසිකිළි පහසුකම්ද සපයා ඇති බව සදහන්ය.

රන්ජන් රාමනායක සිරගතව මේ වන විට සති දෙකකට වැඩි කාලයක් ගතවී ඇතත් තවමත් ඔහුට සිරකරු අංකය නිකුත් කර නොමැත. එය ඔහුට ලැබෙන්නේ නිරෝධායනය අවසන් වීමෙන් අනතුරුවය. අගුණුකොලපැලැස්ස සිර කදවුරේ අධිකාරිවරයා විසින් රන්ජන් රාමනායක නම් වූ’සිරකරුවාව වැඩ පාටිවලට යොමුකෙරෙන්නේද ඉන් අනතුරුවය. සිරකරු අංකය නිකුත් කිරීමෙන් අනතුරුව අගුණුකොලපැලැස්ස සිර කදවුර තුළදී පමණක් නොව, රන්ජන් රාමනායක සම්බන්ධයෙන් සිර කදවුරේ කෙරෙන විමසීම් පවා සිදුවන්නේ සිරකරු අංකයෙනි.

රිමාන්ඩ් සිර කරුවන්ගේ දුක සැප සොයා බලා ඒ අයට අවශ්‍ය ආහාර පාන තුන් වේලටම ලබාදීමට හැකියාව ඇතත් දඬුවම් නියම වූ’සිර කරුවෙකුට ඒ වරප්‍රසාදය හිමි වන්නේ නැත. දඬුවම් නියමවූ’සිර කරුවෙකුගේ දුක සැප විමසීමට පවා ඔහුගේ පවුලේ ඥාතියෙකුට අවස්ථාව උදා වන්නේ මාසයකට වරක් පමණි. ඒ පැය භායකටය. ඊට අමතරව ඔහුට රසවත් ආහාර පාන ලබාදීමට හැකියාව ඇත්තේ නිදහස් දින සහ වෙනත් විශේෂ දිනයන්වලදී පමණි. ඒ අනුව සිර දඬුවම් නියම වූ’සිර කරුවන්ට සිදුවන්නේ සිර කදවුරේ කල්දේරම් බතේ රස වැඩි කාලයක් රස විඳින්නටය.

එහෙත් රන්ජන්ට එසේ කල්දේරම් බතේම රස බලමින් සිටින්නට සිදුවේවි දැයි කියන්නට බැරිය. අගුණුකොලපැලැස්ස සිර කදවුරට ගිය ඔහුව සිරකරුවන් පිළිගන්නේ උණුසුම් ලෙසිනි. සිරකරුවන් අතර ඔහුට ඇත්තේ ගෞරවයකි. දැනට ඔහුව රඳවා ඇති ‘සී’ වාට්ටුවේ පවා ඔහු සිටින්නේ රජෙක් ලෙසිනි. මුල් දිනය ඔහුට එම වාට්ටුව ආගන්තුක ස්ථානයක් වුවත් දෙවැනි දිනයේ සිට ඔහුට එය සිය නිවෙස බවට පත්ව ඇත. නිදා ගැනීමට ඔහුට ලැබී ඇත්තේ කොට්ටයක්, පැදුරක් සහ ඇතිරිල්ලක් පමණි. මෙට්ටයක් අවශ්‍ය නම් ඔහුට ඒ සඳහා ඉල්ලීමක්ද කළ හැකිය. මෙතෙක් ඔහු ඒ ඉල්ලීම කර නැත. ඔහුට ආවතේව කරන්නට පවා සිර කරුවන් සැදී පැහැදී සිටීමද විශේෂිතය. රන්ජන් උදේ – හවස ශරීර සුවතා ව්‍යායාමවලද නිරත වීම විශේෂිතය. එසේම ඔහු පොත්, පත්තරද කියවමින් කාලය ගතකරමින් සිටී. ඒ අතර ‘සී’ වාට්ටුවේ රඳවා සිටින සෙසු සිරකරුවන් රන්ජන් සමඟ අල්ලාප – සල්ලාපයේද නිරතවෙමින් සිටින්නේ සැලෝලොයිඩ් ලෝකයේ රසමුසු කථා අසමිනි.

රන්ජන් තවමත් සිටින්නේ නිරෝධායනයේය. දින 14කට පසුව ඔහුව සිරමැදිරියකට හෝ වාට්ටුවකට යොමු කරනු ඇත. වාට්ටුවක් යැයි බන්ධනාගාර භාෂාවෙන් කියන්නේ සිරකරුවන් රඳවා තැබෙන ශාලාවන්ටය. රන්ජන් ශාලාවක රඳවා තැබුවත්, සිරමැදිරියක රඳවා තැබුවත් දහවල් කාලයේදී ඔහුට සෙසු සිර කරුවන් සමඟ මුසු වීමට අවස්ථාව උදාවනු ඇත. ඒ අය අතර රන්ජන්ව සිය සිනමා වීරයා බවට පත්කරගත් සිර කරුවන්ද නැත්තේ නොවේ. එවැනි සිර කරුවන්ගෙන් රන්ජන්ට ලැබෙන පුද සත්කාර සහ සැලකිලි අඩුවක් නොමැතිව ලැබෙනු ඇත. හිරේට එන්නට පෙර ඔහු ගතකළ සුඛෝපභෝගී ජීවිතය හිරේ ඇතුළේත් ඔහුට ඒ අයගෙන් ලැබීමට ඇති ඉඩකඩ බොහෝය. ඒ දැනටමත් ඒ දේවල් ඔහුට ලැබෙන බැවිනි. කෝවි.ඩ් වසංගත තත්ත්වය පහව යාමෙන් පසුව ඔහුට කල්දේරම් බතේ රස වෙනුවට සිය සිනමා ලෝලී’සිරකරු වන්ගෙන් රස නහර පිනායන ආහාර පානද ලැබෙනු ඇත. එසේම ඔහුගේ දුක – සැප බලන්නට එන අමුත්තන්ගෙන්ද අඩුවක් නොවනු ඇත. ඒ පාර්ලිමේන්තු මන්ත්‍රීවරුන්ට සිර කරුවන් මුණගැසීමට සීමාවන් නොමැති බැවිනි. එස්. බී. දිසානායක මෙන්ම ඥාන. සාර හිමියන්ද සිරගෙදර රඳවා සිටි කාලය පුරාවටම දිනපතා මැති ඇමතිවරු ඒ අයගේ දුක-සැප විමසන්නට සිර කදවුරට ගියෝය. ඒ අයට පැය භාගයේ සීමා නැත. ඇති තරම් කාලයක් සිරකරුවන් සමඟ ගතකරන්නට වරප්‍රසාද හිමිය. මේ දිනවල ඒ අවස්ථාව අහිමිව ඇත්තේ කෝ.විඩ් වසංගත තත්ත්වය හේතුවෙනි. වසංගත තත්ත්වය පහව යාමත් සමඟ අගුණුකොලපැලැස්ස සිර කදවුර පිරෙනු ඇත්තේ රන්ජන්ගේ දුක සැප සොයා බලන්නට එහි යන පාර්ලිමේන්තු මන්ත්‍රීවරුන්ගෙනි.

Next Post

ගෙදර තිබ්බ මනරම් බුදු පිලිමය නෑ - බෞද්ධ පොත්පත් ලොරියකින් පල්ලියට යවලා - කලා යුවලක් විසින් වික්ටර් ශූරීන්ට හදපු පල්ලි පිස්සුව

Sun Jan 31 , 2021
වික්ටර්ගේ සමදුක මිත්‍ර දයා විජේසේකර වෙත, අප ඇමතුමක් ලබා දෙන්නේ, වික්ටර් රත්නායක නම් මහා ජාතික වස්තුව පිළිබඳව පැතිර පවත්නා, කතාව සහ ඒ වන විටත් සමාජ මාධ්‍ය ජාලා හි ප්‍රචාරය වෙමින් පවතින වීඩියෝවේ ඇත්ත නැත්ත පිළිබඳව, ඔහු දන්නේ කුමක්දැයි අසා දැන ගන්නටය. ඒ කතාව දික් ගැස්සී, වැඩිදුර තොරතුරු දැන ගැනීම සඳහා […]