කොවිඩ් දෙවැනි රැල්ලක් – අද දවසට 293 කල යුතු දේ මෙන්න

අද දිනයේදී මේ දක්වා කොවිඩ් ආසාදිතයන් 293ක් වාර්තා වී ඇති බව රජයේ ප්‍රවෘත්ති දෙපාර්තමේන්තුව සඳහන් කරයි.මෙයින් ආසාදිතයන් 283ක් කන්දකාඩු පුනරුත්තාපන මධ්‍යස්ථානයෙන් වාර්තා වී තිබේ.

ඉතිරි රෝගීන් 10 දෙනා අතර ඉන්දියාවෙන් පැමිණි 9ක් හා පාකිස්තානයෙන් පැමිණි එක් අයෙක් වෙයි. මෙම ආසාදිතයන් 10 දෙනා නිරෝධානය වෙමින් සිටි අයයි.

කන්දකාඩු පුනරුත්ථාපන මධ්‍යස්ථානයෙන් හමුවූ ආසාදිතයින් පොකුරත් සමඟ රට තුළ කොරෝනා හෙවත් කොවිඩ් 19 දෙවැනි රැල්ලක් මතුවීමේ දැඩි අවදානමක් මතුව ඇති බැවින් දිනකට සිදුකරන පී.සී.ආර් පරීක්‍ෂණ ප්‍රමාණය වහා ඉහළ නැංවිය යුතු යැයි රජයේ වෛද්‍ය නිලධාරීන්ගේ සංගමය පවසයි.

දෙවැනි රැල්ලක් පැමිණීම වළක්වා ගැනීමට නම් මසකට පී.සී.ආර් පරීක්‍ෂණ 68,000ක් එනම් දිනකට 2,500ක් පමණ කළ යුතු බවට සෞඛ්‍ය අමාත්‍යාංශයේ වසංගතවේද විද්‍යාඥයින් පවසා තිබියදීත් පසුගිය මාස දෙකක කාලයේදී දිනකට සිදුකර ඇත්තේ පරීක්‍ෂණ 500ත් 1,600ත් අතර ප්‍රමාණයක් බව රජයේ වෛද්‍ය නිලධාරීන්ගේ සංගමයේ ලේකම් වෛද්‍ය සෙනාල් ප්‍රනාන්දු මහතා පැවසීය.

සමාජය තුළ කොරෝනා වයිරසය ඇත්දැයි හඳුනාගත හැක්කේ විද්‍යාත්මක ක්‍රමයකට අහඹු නියඳි තෝරාගෙන පී.සී.ආර් පරීක්‍ෂණ කිරීමෙන් පමණක් බැවින් දිනකට එම පරීක්‍ෂණ 2,500ක්, 5,000ක් වැනි ප්‍රමාණයක් කළ යුතුව තිබෙන බව ද වෛද්‍ය සෙනාල් ප්‍රනාන්දු මහතා සඳහන් කළේය.

ලේකම්වරයා මේ බව පැවසුවේ රජයේ වෛද්‍ය නිලධාරීන්ගේ සංගම් මූලස්ථානයේදී අද (10) පැවති මාධ්‍ය හමුවක් අමතමිනි.

වයිරසය වැළඳීමේ දැඩි අවදානමක් ඇති අය ලෙස හඳුනාගෙන ඇති අය මෙන්ම රෝහල්වල බාහිර රෝගී අංශවලට එන උණ සෙම්ප්‍රතිශ්‍යා රෝග ලක්‍ෂණ ඇති අය, සාමාන්‍ය නිරෝගී ජනතාව, රෝගීන් සමඟ සබඳතා පැවැත්වූ අය හා ඔවුන්ගේ ස්පර්ශකයින් අතරින් අහඹු නියඳි තෝරාගෙන පරීක්‍ෂා කළ යුතු බව ද ලේකම්වරයා කීවේය.

පරීක්‍ෂණවලින් වයිරස ආසාදිතයින් නොවන අයත් නැවත නැවත පරීක්‍ෂා කළ යුතු බව කී සෙනාල් ප්‍රනාන්දු මහතා එසේ සිදුකළේ නම් කන්දකාඩු පුනරුත්ථාපන කඳවුරේ ආසාදිතයින් සංඛ්‍යාව මෙතරම් ඉහළ නොයාමට ඉඩ තිබූ බව ද පැවසීය.

මීට පෙර දිනපතා රැස්වූ වසංගතවේද විද්‍යාඥයින්, විශේෂඥ වෛද්‍යවරුන්ගෙන් සමන්විත කොවිඞ් 19 පාලනය කිරීමේ තාක්‍ෂණ කමිටුව මේ වන විට මසකට වඩා කාලයකින් රැස්වී නැතැයි කී ලේකම්වරයා එය ඉතා බරපතල තත්ත්වයක් බවත්, එය නැවත කැඳවමින් අවශ්‍ය තීන්දු තීරණ ගන්නැයි සෞඛ්‍ය බලධාරීන්ගෙන් ඉල්ලා සිටින බවත් සඳහන් කළේය.

Next Post

ඊයේ සිට රටවල් 13ක සිට ඉතාලියට ඇතුලු වීම තහනම් කරයි

Sat Jul 11 , 2020
ඉතාලියට ඇතුලුවීමේ ආවදානමක් හේතුවෙන් රටවල් 13 ක  සංචාරකයන් හා වෘත්තිකයන් සඳහා ඉතාලියට ඇතුලුවීමේ තහනමක් ඊයේ (10දා) සිට පැන වු බව ඉතාලි සෞඛ්‍ය අමාත්යංශය පැවසීය.  බංගල්දේශය, පැනමාව, මෝල්ටාව, පේරු, බ්‍රසිලය, කුවේට්, ඔමාන්, චිලි, ඩොමෙනිකන් රාජ්‍ය, අර්මේනියාව, බොස්නියාව, මැසඩෝනියාව ,බහරේන් එම තහනමට ලක් වු රටවල් වෙයි. එම රටවල් සමග සියලුම නාවික හා […]